Image haute résolution sur Gallica

DE L’ŒIL.
Discours Troisiesme.

S’il estoit possible de couper l’œil par la moitie, sans que les liqueurs dont il est rempli s’escoulassent, ni qu’aucune de ses parties changeast de place, et que le AT VI, 106 plan de la section passast iustement par le milieu de la prunelle, il paroistroit tel qu’il est representé en ceste figure. ABCB, est vne peau assés dure et espaisse, qui compose comme vn vaze rond dans lequel toutes ses parties interieures sont contenues. DEF, est vne autre peau plus deliée, qui est tendue ainsi qu’vne tapisserie au dedans de la precedente. ZH, est le nerf nommé optique, qui est composé d’vn grand nombre de petits filets, dont les extremités s’estendent en tout l’espace GHI, où se meslant auec vne infinité de petites veines et arteres, elles composent vn espece de chair extremement tendre et delicate, laquelle est comme vne troisiesme peau, qui couure tout le fons de la seconde. KLM, sont trois sortes de glaires ou humeurs fort transparentes, qui remplissent tout l’espace contenu au dedans de ces peaux, et ont chacune la figure, en laquelle vous la voyés icy representée. Maire, p. 27
Image haute résolution sur Gallica Et l’experience monstre, que celle du milieu L, qu’on nomme l’humeur cristaline, cause à peu prés mesme refraction que le verre ou le cristal ; et que les deux autres K et M la causent vn peu moindre, environ cõme l’eau cõmune, en sorte que les rayons de la lumiere, passent plus facilement par celle deu milieu, que par les deux autres ; et encores plus facilement par ces deux, que par l’air. En la premiere peau, la partie BCB est transparẽte, et vn peu plus voutée que le reste BAB. En la seconde, la superficie AT VI, 107 interieure de la partie EF, qui regarde le fons de l’œil, est toute noire et obscure ; et elle a au milieu vn petit trou rond FF, qui est ce qu’on nomme la prunelle, et qui paroist si noir au milieu de l’œil, quand on le regarde par dehors. Ce trou n’est pas tousiours de mesme grandeur, et la partie EF de la peau en laquelle il est, nageant librement dans l’humeur K, qui est fort liquide, semble estre comme vn petit muscle, qui se peut estrecir et eslargir à mesure qu’on regarde des obiets plus ou moins proches, ou plus ou moins esclairés, ou qu’on les veut voir plus ou moins distinctement. Et vous pourrés voir facilement l’experience de tout cecy en l’œil d’vn enfant. Car si vous luy faites regarder fixement vn obiet proche, vous verrés que sa prunelle deuiendra vn peu plus petite, que si vous luy en faites regarder vn plus esloigné, qui ne soit point auec cela plus esclairé. Et derechef qu’encores qu’il regarde tousiours le mesme obiet, il l’aura beaucoup plus petite, estant en vne chambre fort claire, que si en fermant la plus part des fenestres on la rend fort obscure. Et enfin que demeurant au mesme iour, et regardant le mesme obiet, Maire, p. 28
Image haute résolution sur Gallica s’il tasche d’en distinguer les moindres parties, sa prunelle sera plus petite, que s’il ne le considere que tout entier, et sans attention. Et notés que ce mouuement doit estre appelé volontaire, non obstant qu’il soit ordinairement ignoré de ceux qui le font, car il ne laisse pas pour cela d’estre dependant, et de suiure de la volonté qu’ils ont de bien voir ; ainsi que les mouuemens des leures et de la langue qui seruẽt à prononcer les paroles, se nomment volontaires, à cause qu’ils suiuent de la volonté AT VI, 108 qu’on à de parler, nonobstant qu’on ignore souuent quels ils doiuent estre pour seruir à la prononciation de chaque lettre. EN, EN, sont plusieurs petits filets noirs, qui embrassent tout autour l’humeur marquée L, et qui naissans aussi de la seconde peau, en l’endroit où la troisiesme se termine, semblent autant de petits tendons, par le moyen desquels cette humeur L deuenant tantost plus voutée, tantost plus platte, selon l’intention qu’on a de regarder des obiets proches, ou esloignés, change vn peu toute la figure du cors de l’œil. Et vous pouués cognoistre ce mouuement par experience, car si lors que vous regardés fixement vne tour ou vne montaigne un peu esloignée, on presente vn liure deuant vos yeux, vous n’y pourrés voir distinctement aucune lettre, iusques à ce que leur figure soit vn peu changée. Enfin OO, sont six ou Maire, p. 29
Image haute résolution sur Gallica sept muscles attachés à l’œil par dehors, qui le peuuent mouuoir de tous costés, et mesme aussi, peut estre, en le pressant ou retirant, ayder à changer sa figure. Ie laisse à dessein plusieurs autres particularités qui se remarquent en ceste matiere, et dont les Anatomistes grossissent leurs liures ; car ie croy que celles que i’ay mises icy, suffiront pour expliquer tout ce qui sert à mon suiet, et que les autres que i’y pourrois adiouster, n’aydant en rien vostre intelligence, ne feroyent que diuertir vostre attention.