I. Louis D'ESTOUTEVILLE à Jean PEVREL, son écuyer.

Pevrel, allez et vous trouvez a la Roche Guyon de mardi en viij jours ou le mercredi devers mon filz de Moion et ma fille, qui partent demain a y aller devers leurs meres pour aucunes choses neccesseres qu'ilz y ont a besoingnier. Si n'y faictes faulte, et quant ilz y auront besoingn, vous en retournerez par deça pour mes besoingnes. Escript en ce nostre chastel de Hambye le xxije jour d'octobre. — Louys seigneur d'Estouteville et de Hambye. — A Jehan Prevel nostre bien amé escuier et serviteur.

II. Robin TROUVÉ, maçon, à Louis D'ESTOUTEVILLE, capitaine de Rouen.

Mon tres honouré et redoubté seigneur, monseigneur de Touteville, cappitaine de Rouen, vuiellez savoir que du de Gacé qu'il ne soit la Saint Jehan, car le briquetier m'a dit que le premier fournel il y aura la moytié de maucuit, pour ce que de la brique il fault que il en face son fournel de la plus mauvesse cuite et de l'autre cuiture du fournel il sera plus de qui[n]ze jours après la Saint Jehan ens.s que nous en eusson point, et pour ce, mon tres honouré et redoubté seigneur, moy Robin Trouvé, mon intention est que l'une des tours soit bien abrogée a celui temps la, car mon prouffit ne seroit pas a atendre ce temps la ; et pour ce je vous envoye ung des quariés qui besongnoit a la quariere, lequel estoit parsormier Trotart, lequel par ce que on vous a dit que nous arion de la brique plus toust que nous ne aron, on la fayt cesser a quarrier, et n'est demouré que ledit Trotart ; et m'est avis pour vostre prouffit et pour le prouffit de la besoigne qu'il seroit bon il besongnast, pour ce que il fauit que nous fesson en deffaulte de pierre ; et pour ce ledit porteur de ceste cedulle, nomé Colin Pourtgueroult m'a dit que il fera le cent de quarel pour dix sols moins et pour moins, pour ce qu'il avoit bone chambre et lit et mesnaige, et est tout hontex qu'il faille qu'il desenpare ; et pour ce, mondit seigneur, du marché que vous ferez avecques ledit Colin, pourteurs de cestez, moy Robin Trouvé le plege et Georgez Freslon dit Franczoys, mason besongnant a vostredit chastel de Gacé, le plege anxi corps pour corps. Aultre chouse ne soy que rescripre fors que le Saint Esperit soit garde de vous et vous dont acomplissement de vos bons vouleirs. Escript a Gacé, le iiije jour du moys de moy. — Le tout plus que vostre serviteur Robin Trouvé, vostre mason de Gacé. — A noble et puisant seigneur Louis, sieur de Touteville, senechal de Normandie, cappitaine de Rouen et du Mont-Saint-Michel.

III. Accord entre l'amiral Jean DE MONTAUBAN, agissant au nom de son frère Arthur, et Louis D'ESTOUTEVILLE, représentant le cardinal, son frère, au sujet de la jouissance des revenus de l'abbaye de Montebourg pendant la vacance du siège abbatial.

Monsieur l'admiral promet et est content en son privé nom, en soy faisant fort quant ad ce pour monsieur de Redon son frere, que les fruis et revenues de l'abbaye de Montebourg de tous le temps passé et escheus depuis le trespas de feu Guillaume Guerin, en son vivant abbé dudit Montebourg, soient et demeurent a monsieur le cardinal d' Estouteville comme commandateur d'icelle abbaye, et fera mondit sieur l'admiral que la main du Roy, qui par son commandement avoit esté mise sur icelle abbaye de Montebourg et revenues d'icelle et sur lesdis fruis, en sera du tout levée au prouffit de mondit sieur le cardinal, sur lesquelz fruis monsieur d' Estouteville promet, pour et en nom de mondit sieur le cardinal son frere, paier ou faire paier six cens ducas es mains de Jullien Tierry en la ville de Regnes dedens le premier jour d'aoust prouchain venant en l'acquit de mondit sieur de Redon pour le vacant d'icelle abbaye de Montebourg qui demeure a mondit sieur le cardinal. Et au regard des biens meubles, soit or, argent ou aultrez choses quelconquez qu'ilz appartenoient audit abbé deffunct alors de son trespas, mondit sieur d' Estouteville, pour et en nom de mondit sieur le cardinal, est content et promet en son privé nom qu'ils soient partiz par moitié entre mondit sieur le cardinal et mondit sieur de Redon. Et pour besongnier a la recouvrance d'iceulx biens, affin d'en faire ledit partage, mondit sieur d' Estouteville, ou nom que dessus, envoiera maistre Jehan CAPREOLL vicaire, et Jehan Lesuret, aians bon povair de contraindre lez religieux et autres que mestier sera tant par sermens, censures ecclesiastiques que par toutes aultres voyes deues et raisonnables. Pour lesquelles choses entretenir, faire et acomplir de point en point chacun de sa part mesdis sieurs ont signé ceste presente cedule de leurs saingz manuelz, promettans entretenir le contenu en icelle sur leurs foy et honneur. Fait en ceste ville de Rouen, ce xvie jour de juillet l'an mil iiijc soixante et trois. Et se fera le partage desdiz biens meubles dedans le xve jour d'aoust prouchain venant. — Louys d'Estouteville. J. de Montauban .

IV. Le grand juge de Bricquebec à Louis D'ESTOUTEVILLE.

Hault, puissant et mon tres redoubté seigneur, a vostre bonne grace humblement me recommande. Touchant les gisez de Briquebeq et de la mer nous n' laissons pas cy bien come nous voullisons, mes tout sera bien come nous pensons. Touchant de peste au pais de ceste viconté de Vallongnes, ne avoit aucunement ne ne a cy non que puix naguerez, et ne soit on dont elle est venue, se est boutée a Pourbail, qui est le hable de par decha la mare de Glatigny ; elle ne y toise fieble ne fort, et ne durent que ung jour. Le curé est desja party. Quant est de Coustances, de Cerencez, de Granville ne de tout ce paiz, elle ne fait que commencher. Nous somes bien ycy, Dieu mercy. Monsieur de Briquebeq se tient trop par della : vous lui deveniez escripre. Touchant de l'abbée de Montebourg, vous avez assés congneusse come tout est allé, quer il vous en a esté escript bien ollong. Lorens le Toussé est disposé de s'en aller par della, et l'est l'en venu querir, conbien, monseigneur, qu'il y fust enchor bien seant, quer veritablement il a tres bien besongné et estoit bien mestier de lui pour le prouffit de monsieur le Cardinal qu'il y fust, quer jour et nuit a besongné, a mon avis, plus soingnousement que ce ce est esté pour lui, et bien le savoit fere et est ung tres grant homme et bien congneussant la chose, et le monstre bien ce qu'il a fait. Monseigneur, je vous en diroye bieaucoupt voullentiers, quer sur ma foy onquez ne vous vy home entour vous touchant le fait que avions a besongner qui miels eust besongné. Messieurs les vicaires du Mont et de Montebourg, ce sont grans gens et qui ont grandement travaillé joieusement et de grant voulloyr, tellement que, se Dieu plaist, tout sera bien. Des finances, où ilz sont, come gouvernez ont esté, qui y a habitté qui ne eust ossé abiter, où est l'argent et tout, Lorens vous comptera mieulx que nul ne saveret escripre, duquel vous prendrez credence. Du seurplus de noz viez et come tout va, monseigneur, l'en ne l'a pas comptenté come il appartient, mez vous taxerez plus plain avis. Mon tres redoubté seigneur, a Dieu, qui vous dainst joie parfette. Escript a Montebourg ce xxviije jour de aoust. — Vost humble serviteur, homme et subget, le grand juge de Briquebeq. — Puissant et tres redoubté monseigneur de Estouteville, lieutenant et gouverneur general et grant seneschal de Normendie. —

V. Arthur DE MONTAUBAN, abbé de Redon, à Louis D'ESTOUTEVILLE.

Mon tres honnoré seigneur. Je me recommande a vous tant que je puys, et vous plaise savoir que j'ay esté informé par moseigneur l'amiral mon frere que ung nommé Guyong Bourgoign, religieux de reverend pere en Dieu monsieur le Cardinal d'Estouteville vostre frere en son eglise du Mont, a dit aucunnes paroles redondant en l'injure de mondit frere, en l'accusant de traison, come d'avoir volu entrer en ladicte place contre vostre volonté. Pour lesquelles mondit frere a esté moult desplaisant, et moy pareillement, et a celle occasion fut ledit Bourgoign mis es prinsons de mondit sieur le Cardinal, où il est encore de present, et il devroit estre plus longuement. Mais pour ce que j'ay esté requis par aucuns de mes amis ses parens, auxi qu'il ne fault pas aucunes foiz pugnir les delinquens a toute rigueur, je vous prie et requier que veilliez & livrer ledit Bourgoign en ma faveur et le faire joyr de ses beneffices et offices, ainsi que par l'avant, et je vous promeit par ma foy que mondit frere retourné aura agreable ladicte delivrance, car il m'a donné puissance de pourveoir au caz dessusdit, et me retourné par delà je vous remerciré de ce que en aurez fait, et vous prie que ainsi vous plaise le faire. Mon tres honnoré seigneur, si chose voulez que ge puisse, mandez le moy et je l'acompliray a mon povair, au plaisir nostre seigneur, qui vous doint ce que desirez. Escrit [à] Angers et signé de ma main le xiiije jour de janvier. — Vostre filz Artur, abbé de Redon. — A tres honnoré et doubté signeur Monsigneur d'Estouteville, capitaine du Mont-Saint-Michel. Lettres ventiez de Bretaigne.

VI. Jean DU HESTRAY, Jean PREVEL et Jean LE MARINIER à Jacques et Guyon D'ESTOUTEVILLE.

Noz tres honnorez et doubtez seigneurs. Nous nous recommandons tres humblement a voz bonnes graces. Plaise vous scavoir que incontinent aprez le retour de Hambye de moy Jehan le Marinier, nous avons conféré avec Veron et Putot, voz recepveurs es terres de par deça, et leur avons déclaré que vostre plaisir estoit qu'ilz ne receussent riens de ceste Sainct Michiel ne du temps ensuyvant jusques a ce qu'ilz eussent paié les restes en quoy ilz sont demourez par la fin de leurs comptes rendus, et aussi qu'ilz eussent rendu leurs comptes, c'est assavoir ledit Putot de l'an lxxiij et ledit Veron des années lxxij et lxxiij, lesquelz leur avons chargé aprester sans aucun delay ou dissimulacion. Et en oultre les avons hastez de paier leursdits restes en toute dilligence. A quoy ilz ont respondu, c'est assavoir ledit Putot que dedens quinze jours sondit compte sera prest, et ledit Veron sera prest incontinent que aurez ordenné voz bons plaisirs sur le fait des relaches que requierent voz hommes de sa charge, car jusques aprez voz ordonnances sur ce faictes il ne scauroit faire sesdits comptes qui sont prestz jusques a la despence. Et pour ce, nous voyans que desja avez eu grans dommages en la deffaulte de ce que plustost n'avez appoincté sur les requestes de vosdits hommes et que plus actendrez a ce faire plus y perdrez, en ensuivant vostre commandement fait audit lieu de Hambye, nous nous sommes transportez sur vos dites terres où mestier estoit, et illec nous sommes sur chacun en particulier informez a toute dilligence, appelez avec nous les bailli et viconte de Berneval , ledit Veron et Gilles le Petit vostre procureur, tant de la cituation et valleur des heritages, des rentes qu'ilz doivent, que des pertes et dommages que ont eues les hommes qui les tiennent pour l'an Lxxij a la cause de la guerre et des feux mis par les Bourguegnons, et tout concidéré, vosdits officiers et nous avons ensembles esté tous d'un oppinion tel qu'il ensuit, c'est assavoir que en tant que touche vostre terre et seigneurie de Berneval, pour le fait de ceulx qui ont eu leurs maisons arses, qui sont nommez en kayer que nous vous envoyons clos par ce porteur et sont en nombre xx-5ci, de voz graces il est bien requis leur faire relache et don de leurs rentes de l'an lxxij et de la moictié de l'an lxxiij, et aux autres hommes d'icelle terre de Berneval qui n'ont point eu leurs maisons arses, non declarez audit kayer, il souffiroit de leur relacher ledit an lxxij Et au regard des fermiers des fermes muables en ladite terre pour ledit an lxxij, que ce seroit bien qu'ilz feussent tenus quictes par paiant ce qui est mis en teste sur chacune ferme en particulier, car nous avons trouvé qu'ilz perdirent entierement ledit an lxxij tous leurs labours, levées et fruitages et grant partie de leurs autres biens. Et en tant que touchent voz autres hommes de voz autres seigneuries qui sont nommez et declarez en particulier dedens ledit kayer clos, les oppinions dessusdites ont esté et sont que de bonne équité relache leur doit estre faicte ainsi et par les sommes qui sont mises en teste sur chacune partie. Et nous semble veritablement et en noz consciences que c'est tout au moins que en puissez donner et relacher, et sommes derrenierement informez que les seigneurs de par deça en ont plus relaché en cas semblable. Si pourrez en surplus faire selon voz bons plaisirs. Au fait de trouver receveurs nouveaulx l'en en trouveroit bien aucuns, mais a nul que ayons ouy palier ne vouldrions conseiller que l'en s'arrestast, et sommes mieulx d'oppinion que, attendu le temps de cest an qui est fort encouru, que ce seroit le mieulx d'en laisser la charge ausdits Putot et Veron et en envoyer par deça commissions qui seroient gardées en noz mains jusques aprez leursdits comptes rendus du temps passé et qu'ilz se feussent hastez de paier leurs restes. Ledit Putot eust en son cas plus dilligence, mais a cause de la damoiselle sa femme qui puis huit jours est allée de vie a trespas il a esté grandement destourbé.

Dymence prouchain lesdits receveurs se treuvent a Rouen avec moy Hestray pour apporter argent et ont esté et seront iceulx receveurs par nous hastez de paier ce qu'ilz doivent en tout ce qui sera possible ainsi que avez ordonné et mandé. Noz tres honnorez et doubtez seigneurs, plaise vous tousjours noces mander et commander voz bons et gracieux plaisirs pour les acomplir de noz povoirs, Au plaisir de Nostre seigneur qui vous ait en sa saincte garde et doint bonnes vies et longues. Escript a Doudeville le vingt jour de janvier. — Voz tres humbles serviteurs Jehan du Hestray, Jehan Prevel et Jehan le Marinier. — A nos tres redoubtéz seigneurs nos seigneurs d'Estouteville et de Briquebec.

VII. Jean DE LORRAINE à Jacques D'ESTOUTEVILLE.

Monsieur d'Estouteville, je me recommande a vous. J'ay receu voz lettres que m'avez escriptes par monsieur de Briquebec et oy tout ce qu'il m'a dit bien au long, en quoy j'ay fait ce qu'il m'a esté possible, ainsi qu'il vous dira plus a plain, et me desplest que mieulx n'ay peu fere ; au surplus, s'il est rien en quoy je vous puisse fere service ne plaisir par deça, faictes le moy savoir pour l'acomplir de tres bon ceux au plaisir Dieu, auquel je pry qu'il vous doint bonne vie et longue. Escript a Nantes ce xviije de septembre. — Le tout vostre cousin, J. de Lorraine. — A Mons. d'Estouteville.

VIII. Jacques D'ESTOUTEVILLE au sieur HUVAL, maître d'hôtel de Jean D'ESTOUTEVILLE, sire de Torcy.

HUVAL, je me recommande a vous. J'envoye a la bastarde deux aulnes de gris, unes templectes et une aulne de velloux et unes matines. Pourquoy baillez les cy et luy faictez faire ses habillemens. En sourplus recommandés moy a monsieur de Torcy et a Madame. Et a Dieu soyés. Escript à Rouen, ce iije jour de decembre. — Le vostre Jaques d'Estouteville.

Je prie qu'elle soit bien batue, car on m'a dit que c'est une tres maulvaise garsse.

Huval, maistre d'ostel de mons. de Torcy.

IX. Jacques D'ARGENNES, serviteur de Jacques D'ESTOUTEVILLE, à son maître.

Mon tres redoubté seigneur tant et sy tres humblement comme puis plus a vostre bonne grace me recommande. Et vous plaise scavoir que a ce soir j'ay sceu par Gieffroy Cornu, qui est venu d'Avranches, que les officiers de monsieur d'Avranches ont reffusé a bailler la collation de la cure de Saint Senier, qu'ilz avoient promise bailler ou jour de hier, ainsi que vous avoye rescript et que devez avoir esté adverty par monsieur l'archediacre. Et veu ces termes, monstrent bien lesdictz officiers qu'ilz n'ont nul bon voulloir envers vous ne mondict sieur l'arche-diacre. Pourquoy, monseigneur, il me semble que y devez pourveoir et que entrecy et la prouchaine assise d'Avranches, qui sera lundi prouchain, ainsi que on dit, on se doit fournir de bon consail pour plaider la matiere dont le mandement a esté pris. par mondit sieur l'arche-diacre, car en telles chose pour y garder vostre bonne droitture riens ne doit estre espargney. Ledit Cornu yra demain au plus matin devers mondit sieur l'archediacre affin qu'il y face ce qu'il est requis y estre fait.

Monseigneur, je vous ay envoyé par le serviteur de Villebaudon la procuracion de Robert et par luy vous ay rescript de toutes nouvelles de par deça et depuis n'est aultre chose sourvenu que ne puissez scavoir. Vous suppliant, mon tres redoubté seigneur, qu'il vous plaise me mander et commander vos bons plaisirs pour tres humblement les acomplir a l'aide de Dieu auquel je pry, mon tres redoubté seigneur, qu'il vous doint bonne vie et longue. Escript en vostre chasteau de Hambye ce mercredi des ferriers de Pasques. — Vostre tres humble et tres obeissant serviteur Jaques d'Arg[ennes]. — A mon tres redoubté seigneur mons. d'Estouteville.

X. Louise D'ALBRET à Jacques D'ESTOUTEVILLE,son mari.

Monsieur, Je me recommande tres hunblement a vostre bonne grace, en desirant bien scavoir de vos bonnes nouvelles. Il n'est rien sourvenu de nouveau depuys que partites, si non que je ne dormy de nuyt ugne seulle gouste. Nous effans sont toulx sains et en bon pouainct, et que il vous plaise me mander tousjours de vos bonnes nouvelles et commander vos bons plaisirs pour tres hunblement les acomplir ; priant Dieu, Monsieur, qui vous dont bonne vie et longue. Escript à Hambye, ce lundi xe jour de novembre. — Vostre tres hunble et loyalle amye, Loyse de Lebret. — A Monsieur.

XI. Jacques D'ESTOUTEVILLE à Geoffroy DAVENEL, son serviteur en Cotentin.

Gieuffray Davenel, apportés quant vous en vendrés toutes les cedulles qui estoient dedans la boette que Costan avoit emblée, et si n'oubliez pas affaire aporter tous les serpeaulx et les hortz et mesmes tous les harnays des chevaulx de feu mon oncle, qui sont de velloux bleu, et si dictez a nostre femme qu'elle n'oublye pas ma vraye croix, et faictez tout bien appoincter par dela avant que de venir, et penssez bien de nostre femme et des effans et qu'ilz ne se mectent pas en chemyn de venir qu'il ne face beau temps. Escript a Vallemont, ce xxiije jour de decembre.

Il a fait le plus terrible tenz depuy que partistez que jamez il feist. Je né point esté malade depuiz que vous partistez sy non qu'il m'est chest dez oz de la main sanie, car le maistre dez boiz lez a fais choir. — Jaques d'Estouteville. — Gieuffray Davenel.

XII. Le sieur DE BRËZÉ à Jacques D'ESTOUTEVILLE.

Monsieur, je me recommande a vous tant fort et de si bon cueur que faire puis. J'ay receu les lettres que vous m'avés escriptes par madamoiselle de Beaumont et pour ceste cause principallement j'envoie Guillaume d'Esquetot, mon maistre d'autel, devers mes officiers pour leur recommander vostre matierre ainsi que je vouldroie les miennes propres.

Monsieur s'il est chose en quoy je vous puisse faire service, en le me faisant savoir je vous asseure que je l'acompliray de tout mon povoir a l'aide de notre seigneur auquel je prie, monsieur, qu'il vous doint l'entier acomplissement de tous voz desirs. Escript a Minet ce ve jour de decembre. — Le plus vostre cousin Brézé. Monsieur d'Estouteville.

XIII. Thomas LE FORESTIER, médecin à Rouen, à Jacques D'ESTOUTEVILLE.

Mon tres honnouré seigneur, tres humblement je me recommande a vostre bonne signourie. J'ay repceu les lettres qui vous a pieu me rescrire et acompli vostre desir au mieulx qu'il me a esté possible selon la poureté de mon estude, etc. Monseigneur, je vous envoye deux clisteres pour prendre l'un apres l'autre. Doncques, s'il vous plaist, vous prendrés le premier mercredi matin, et l'autre jeudi, et tousjours a jun. Et a esté fort bien advisé de en demander deux, car, selon nostre faculté, les humeurs qui sont esmeux par la premiere medicine convenientement se peulent en partie mieulx evacuer par la seconde que par la premiere, et medecin ne vous eust sceu mieulx conseiller. — Item je vous ordonne ung onguement selon que je congnois vostre cas et est viron selon la description de celuy que avec eu par cy avant ; lequiel, si vous plaist, vous feres mettre sur cuir blanc comme celuy de quoy hom fait les bources. Et gardés que l'emplastre soit plus grand que le lieu de la douleur, etc. Et quant l'amplastre sera mis sur le lieu, il ne soit remué en auchune maniere tant que la moisteur soit consumée ; puis apres renouvellés lay de rechief, etc. — Item, usés de vos pillulles, car vecy le temps de mars que nous disons prim temps, lequiel jette hors les vieulles robes, et devient gorrier, car il renouvelle les vieulles danses, comme goutte, pleuresies,flebvres et aultres, etc. ; par quoy il est bon de tenir sobre diette et de soy purger des maulvaises humeurs flegmatiques qui ont esté engendrées en temps de froideur par cy avant. Monseigneur, je remet tout a votre discretion. Monseigneur, il est escript Ecelesiastici c° viij° «Honora medieum propter neccessitatem ». La plus noble creature que Dieu ait jamais créé en ce monde, c'est l'homme.«Ad yntaginem Dei factus est homo » ; laquelle creature est ordonnée a possider le souverain bien «bonum honestum » ; lequel bien jamais nous ne povons acquerir si non par bonnes operations ; lesquelles operations nous ne povons faire sans estre ; par quoy je conclu que pour estre, «sciticet in sanitate », il [est] de necessité de user de medicine ; par laquelle science hom peult souvenir aux accidens qui plusieurs foys font nature chair et trébucher. Mays bien souvent hom tient plus conte des choses qui ne valent riens que de celles qui sont de valeur et de effect. Ung advocat ayra cent livres de pension et vendra la cause de son maistre, ung procureur et asses d'aultres qui vouldroit aleguer. Mais celuy qui doibt avoir cause de prendre garde a l'ame, hom ne tient compte pour le corps en cas semblable «opera enim illorum », etc. Mays, monseigneur, que ne vous desplaise et que ne soys trop longt, et a ma conscience je vous vieulx dire verité. Il me semble que debveriés avoir ung medecin ou deux a pencion, a celle fin telle qu'il fust plus inclin a soubzvenir a vostre neccessité, et aucy de pencer tousjours a vostre cas. Et vous congnoissés que en vous il peut grant poys, c'est autant que vous, madame, vos enfans et terres valent. Et vous donneriés bien a tel qui par aventure ne vous feroit que peu de cervice cen ou plus de quoy vous pourriés entretenir ung ou deux docteurs en vostre faculté, qui seroient tousjours en labeur de vous conforter et entre [te] ; car la joye du medecin, quelque practique qu'il en ait, c'est de voir son pacient en convalescence et prosperité. Les medecins hont grans coustages et despences en estude, livres et aultres, etc. Et il ne peulent pas bien soy entretenir par les goures, qui n'ont riens, mays par les nobles et riches qui hont de quoy. Par quoy, monseigneur, vous etes ung des piliers de noblesse. Faictes tant que les medecins aient causent de tourner les volumes de leurs estudes pour cause de aisder et soubvenir a vos douleurs languissantes et accidens. — Mon tres honnouré seigneur, je vous supply qu'il vous plaise me pardonner si tant je me suys enhardi de vous rescrire et de vous faire si longt procés, mays plus ne me adviendra, non obstant que je dy verité et selon que me semble estre vroy ; car le medecin fait auchune foys autant par amour comme pour argent.«Sed omises vivere ». Vous plaise me commander vostre plaisir et je l'acompliroy au plaisir de Nostre seigneur Jesu Christ qui vous vieulle par sa grace guerir et delivrer de vos langueurs. Amen Jesus.

Monseigneur, pour cause que vostre chappelain est embesongné en ceste ville a la raison de vos besongnes, y vous envoye ce messagier pour cause que je dit audit chappelain que le temps ce passe pour recepvoir clisteres ou purgation ses deux jours passés. Item, je rescripré par ledit chappelain a ma tres hormourée dame, vostre espouse, touchant certaines questions qu'elle demande. Doncquez par ledit je luy rendroy responce. — Le vostre tres humble clerc et serviteur T. Leforestier. — Mon tres honnouré seigneur, mons. d'Estouteville.

XIV. Jacques D'ESTOUTEVILLE à Jacques D'ARGENNES, son serviteur à Hambye.

Jacques d'Argennes, J'ay receu vos lettres et celles de Madame par Guillaume Dupré. Quant au regard de ce que dictez que ne povez tirer argent de ces recepveurs et prevostz si n'est a grant paine, quelque paine que vous y aiez, si les faictez tirer en avant.

Quant est de Robin Neel, il arriva jeudi devers moy. J'ay envoyé Jacques Lecoq devers monseigneur le chancellier pour avoir le mandement pour Greutel, lequel le vous envoye.

Touchant Beaufilz et Jourdan pour le mariaige de Guillaume Barbin, ledit Guillaume Barbin m'a rescript que madame de Vergye luy a dit que s'il ne se vieult point mesler de mariaige, qu'elle luy fera donner ung bon pot de vin. Dictez audit Guillaume Barbin que je luy mande et conseille qu'il preigne le bien bon pot de vin et que nous trouverons des femmes encores meilleures que celle-là, et luy monstrez cet article affin qu'il vous en croye mielx.

Vous m'avez rescript que vous faictez venir du boys et qu'il y en a plus qu'il n'y eult mais en piece. Je le voyré o l'aide de Dieu de bref, si en avez fait telle diligence que vous dictez, mais pourtant ne cessez point d'en faire amener a puissance.

Dictez a Guillemine que je me recommande a elle et que je ne luy rescrips riens pour ce que je pance la aller veoir ung de ses jours. Escript à Mo... ce xije jour de juillet.

Je rescrips unes lettres au lieutenant et procureur de Roy. Lissés les et les faictez lire a Felice et les reclouez et que ledit Felice les baille au lieutenant et procureur de Roy.

Vous ne m'avez point rescript quant lepvrons lepvrière a euz, comment qu'elle soit. Qu'elle soit bien pancée et qu'elle ait la souppe touts les jours deulx foiz et qu'elle ne soit point sallée, et si elle avoit quelque petit de galle, dictez a Binet qui la guerisse hastivement. Et si dictez audit Binet qu'il me actende a chasser et que je pance estre bien tost par dela et qu'il regarde bien par tout ou il y aura des serfz et qu'il preigne des esperviers branchés et le dictez aussi à Colin Jacques. Escript comme dessus. — J. d'Estouteville. — Jacques d'Argennes, l'astre bien amé serviteur.

XV. Jean LE MARESCHAL à Jacques D'ESTOUTEVILLE.

Mon redoubté et tres honoré seigneur humblement me recommande a vostre noble et bonne grace. J'ay presentement receu les lettres qu'il vous a pleu m'escripre pour le fait des oyseaulx qui avoient haire ceste année au bout d'une piece de terre sur la mer tenue d'un petit fief noble a moy appartenant, assis en la parroisse de Belleville, auprès de vostre seigneurie de Berneval, affin que je les feisse garder pour vous.

Mon redoubté et tres honoré seigneur, incontinent vos lettres receues, que m'a baillées vostre sergent ce porteur, j'ay envoyé a toute dilligence querir mon prevost a Belleville affin de mettre gardes sur lesdits oyseaulx.

Lequel mon prevost m'a rapporté, present vostre dit sergent, que des mercredi derrenier vers le soir, que j'estoye encore es assises de Monstiervillier, et aussi je n'avoye jamais oy parler que lesdits oyseaulx eussent aire sur mondit fief, deulx jentilz hommes demourans en la conté d'Eu, lesquelz cedit porteur vous nommera, vindrent acompagnés de grant nombre de compagnons embastonnés, par lesquelz furent prins en ny desdits oyseaulx quatre oeulx et emportés par l'un desdits gentilz hommes, dont il me desplest et me semble que ce a esté trop entrepris, car ilz povaient bien savoir et aussi vous, mon redoubté seigneur, vous povyés tenir sieur que les vous eusse fait garder et porter avant tout autre.

Mon redoubté et tres honoré seigneur, se en ceste matere eusse esté adverti au devant du cas advenu, je y eusse bien mys la provision et suys fort courrouché pour l'onneur de vous que n'y puis donner le remède et que l'entreprinse a esté ainsi oultrageusement faicte audevant qu'il feust heure de les deshairer sans avoir gasté lesdits oeufz. S'il est en sourplus chose que vostre noble plaisir soit me commander ou fere savoir, je suys deliberé de l'acomplir a mon povoir, priant nostre créateur qu'il vous doint bonne vie et longue. Escript a Dieppe ce vendredi xe jour d'avril. — Vostre humble serviteur Jehan le Mareschal. — Haut et puissant mon redoubté et tres honoré seigneur monseigneur d'Estouteville.

XVI. Jean, vicomte DE ROHAN, à Jacques D'ESTOUTEVILLE.

Monsieur d'Estouteville, mon cousin. Je me recommande a vous tant comme je puis. J'ay receu voz lettres par ce porteur, par lesquelles me escripvez que mes gens ont fait de grans pilleries en vostre terre, dont je suis tres desplaisant, et vous certiffie, si je puis savoir lesquelz se sont, que je leur donneray a congnoistre qu'ilz n'ont pas bien fait.

Mon cousin, je renvoie ce porteur devers vous pour me apporter les oyseaulx que m'avez donné. Et au regard des levriers que me demandez, pour ceste heure ne les vous sauroie envoier, car ce que j'en ay sont en une maison que j'ay en Poictou ; mais si toust que je les pourray recouvrer, il n'y aura point de faulte que n'aiez vostre part. Priant a Dieu, mon cousin, qu'il vous doint ce que desirez. Escript a Dynan, le xxvie jour de juing. — Le tout vostre cousin Jehan de Rohan. — A mon bon cousin mons. de Touteville.

XVII. Jean SANSON, serviteur de M. D'ESTOUTEVILLE, à Bertrand GUILLOT.

Mon bon ami Bertran, je me recommande a vous tant et de si bon cueur comme je puys, en vous priant que il vous plaise me recommander tres humblement a la bonne grace de Monseigneur et de Madame et de Messieurs les enfans, a mes damoyselles Marguerite, Ysabeau, Jehenne et Souveraine et a toultes les damoyselles. Plaise vous scavoir que je suys bien esbahy que ne m'avés rescript ou mandé de vos nouvelles les quelles jé tant desirées et desire tousjours ; mais au fort comme je puys considerer, je croy que il ne vous souvient plus de nous. Monsieur le Receveur se recommande a la bonne grace de Ma dame et de toultes les damoyselles. Je vous prye de rechief que il vous plaise me recommander a monsieur de Sasse-ville, a Pierres Douayssant et a mon parfayt ami Pierres Douessy, a Jennotin. Au reguard des nouvelles de par desa il n'y en a nulles, desquelles ne soyés bien adverty. Il vous plaira me recommander a mon bon ami le barbier et a toulx ceulx de la maison. Et a Dieu soiés, qui vous doint ce que vostre cueur desire. Escript a Hambye, ce lundi ije jour de mars. — Le vostre serviteur et amy, Jehan Sanson. — A mon bon ami Bertran Guillot. — Hetrez, allez ne faillez mye saluer monsieur le maistre Jaquez d'Argenez a Hambie, en aultre lieu ne vous fault nuictée.

XVIII. Jean SANSON, serviteur de M. D'ESTOUTEVILLE, à Jean LE JOLIS, barbier.

Mon bon ami barbier, je me recommande a vous tant et de si bon cueur comme je puys, en vous priant que il vous plaise me recommander tres humblement a la bonne [grâce] de Monseigneur, de Madame et de Messieurs les enffans. Plaise vous scavoir que Jehan Raul arriva jeudi au soir de Saint Malo, là où il estoit allé pour monsieur le capitaine de Hambye, son maistre, lequel a rapporté pour certain que il est descendu en Basse Bretaigne de sept a huict mille Engloys, lesquieulx se sont mis et alliez ovecquez les Bretons, et que nos gens se sont toulx retirés de Basse Bretaigne, et ce en sont venus a Dignam, ainxi que ledit Jehan Raul a rapporté et ainsi que Basire de Saint Malo a rescript audit cappitaine de Hambye, lequel se recommande bien a vous, et monsieur le receveur Jaques d'Argennes. Desrainement que Colin le Febvre retourna de Vallemont je luy demandé comme vous le faysiés et il me dist que vous estoyés venu par desa voir vostre bonne amye et que a son advins que vendriés a Hambye, de laquelle chosse je estoyet bien joieulx. Mon bon amy, se il est service que pour vous puysse, mandés le moy et je le acompliroy de bon cueur scelon ma puyssance, laquelle est petite, mes la volemté est bonne. Je vous pry que il vous plaise me recommander a Gieffroy Daveney, a Jennotin, a Pierres Douessy et a toulx ceulx de la maison ; priant Dieu, mon parfayt amy, qui vous doint joyee parfecte. Escript a Hambye ce vendredi ixe jour de apvril. — Le vostre serviteur et ami Jehan Sanson. — Mon bon ami Jehan le Joliz, barbier de mons. d'Estouteville.

XIX. Jean DE SAINT-GERMAIN à Jacques D'ESTOUTEVILLE.

Mon tres honnouré seigneur tant humblement comme je puis tousjours a vostre bonne grace je me recommande.

Monseigneur, en depuis le partement du barbier j'ay tenu et fait une monstre des gens de ceste ville, et a esté faicte sur les portes, tours et murs de cestedicte ville, et leur ay commandé de par le Roy et vous que ilz soient de dymenche en huit jours toulx en bons et suffisans abillemens de guerre ausdis lieux e l'eure que il leur sera fait scavoir, et l'ay fait pour ce que il sembloit que les dictes gens de cestedicte ville le voulsisent de eulx mesmes entreprendre, et depuis samedi desrain au soir leur ay fait toulx les soirs aporter les clefz de leurs portes. Bertrain vous pourra dire comme tout se porte et ausi vous pourra dire des nouvelles que nous advons ycy du pays de Brethaine.

Monseigneur, j'ay fait mettre deulx cens boysseaulx d'avayne en grenier et y a du vin, du sildre, du boys lequel j'ay fait depecer, et de la paille. Quant il vous plaira venir vous trouverés au mieulx que j'ay peu vostre logys appointé, et ne vous desplaize se plus souvent ne vous escrips, caer le plus et le mieulx il y a des nouvelles qui ne se trouvent pas vrayes.

Du jour d'yer monsieur de la Ferté passa par ycy et venoit de la benedicion de l'abbé de Hambye et m'a dit que l'esvesque de Constances leur a fait pour l'onneur de vous ung bien grant racueil, et a fait cesser toulx ses officiers et fait bailler sans riens paier les asoultes a toulx ceulx qui avoient mis et esté de l'aide a mettre les notaires et tabellions imperiaulx qui estoient audit Hambye pour cuider passer et bailler lectre de l'eslection que avoient entreprinse faire les religieux hors du dorteur de ladicte abbaye. Il m'a dit que il vous pensoit trouver ycy, et monsieur l'archediacre luy avoit rescript que vous y estiés.

Le sieur Derues, pere de celuy a qui l'esvesque d'Avrenches a donné Saint Cellier, et moy advons parlé ensembles de ladicte cure de Saint Cernier, et je luy ay dit comme vous l'avés donnée a vostre bastart, et il m'a respondu que en nulle maniere il ne vouldroit que luy ne aucuns de ses enffans feissent chose qui vous despleust, et croy qu'il fera faire a sondit filz ce que vostre bon plaisir vouldra ordonner.

Monseigneur, je pri a Dieu, nostre createur, qu'il luy plaize vous donner en bref bonne santé et l'acomplissement de voz nobles desirs. Escript au chasteau de Fallese ce jeusdi absolu xvije jour d'apvril. — Le tout vostre humble serviteur Johan de Sainct Germain. — A mon tres honnouré seigneur, monseigneur d'Estouteville.

XX. Françoise D'ESTOUTEVILLE à Jacques D'ESTOUTEVILLE, son père.

Monsieur mon oste, je me recommande bien fort à vos bonnes graces pour des nouvelles de par deça. Vous plaist savoir Madame, mon frere Jehan, mon frere Loys et mon frere Anthoine sont tretous bien sains et en bon point, et ne faisons que regarder de jour en jour quand reviendrez. Je vous prye, n'oubliez pas a me rapporter du veloux. Faites toujours bonne chere, mon hoste, et nous la ferons bonne, et se vous ne venez bientout, mandez nous vos bons plaisirs pour humblement les accomplir. A Dieu soyez, monsieur mon hoste, qui vous donne bonne vie et bonne santé. — Vostre tres humble fille et ostesse Françoise. — De Valmont, ce xe jour de may.

XXI. Jacques DU HESTRAY à Jacques D'ESTOUTEVILLE.

Mon tres doubté seigneur, je me recommande a vostre bonne grace tant humblement come je puis. Plaise vous scavoir que jeudi derrenier Madame nous envoya aux Loges pour chasser, et trouva Clement ung cerf aux buisson de Pissecat et fut donné aux chiens vendredi et fut prins en vostre forest là où nous avions tendu, et chasseront vos chiens tres bien, et quant vous vendrés, vous les trouverez bons.

Monseigneur, Madame est bien saine et fait bonne chiere et aussi sont tous messieurs vos enffans.

Mon tres doubté seigneur, il vous plaira me commander vos bons plaisirs, lesquelx je suys prest d'acomplir a mon petit povoir a l'aide du createur qui vous doint santé et bonne vie et longue. Escript en vostre place de Vallemont, ce viije jour de juing. — Vostre tres humble serviteur, Jaquez du Hestray. — A mon tres doubté seigneur, monseigneur d'Estouteville.

XXII. François DE LAVAL à Louise D'ALBRET, dame D'ESTOUTEVILLE

Ma tante, je me recommande a vous tant que je puis. J'envoye devers mon oncle ly porter ung regyme de maistre Girard, medecin du Boy, et croy qu'il s'en trouvera mieulx.

Ma tante, Je ly escriptz comme le Boy a prins mon cheval et comme en quelque fasson je n' puis recouvrer, je vous prye astre mon advocat envers lui, et je me oblige corps et biens de l'en recompensser en ce qu'il lui plaira.

Ma tante, ma mye, je prye a Dieu qu'il vous doint tout ce que plus desirez. Escript a Harefleu le ixe jour de juillet. — Vostre bon et loyal nepveu Françoys de Laval. — A la tante Madame d'Estouteville.

XXIII. Le sieur DE CHOISEUL à Jacques D'ESTOUTEVILLE.

Monseigneur, je me recommande a vous tant et de sil bon ceur comme je puis.

Monseigneur, je vous amvoye deulx terselexs et ungt aultour, dont ungt des terselexs a perdeul ungt oncle deul pier drect, et sil l'année qui vient vous en voullexs avoir, il vous fault amvoer de melleur a selle fin que je vous en recouvre tout sela qui vous plaira me commander. L'autour est de bonne aiyre. Et seur se feré fin am vous seulplyant que je soye recommander a la bonne grasse de Madame et s'il est servyse am quoy je vous puisse faire et il vous plait le me commander, je le feré d'aulsil bon ceur que pour homme deul monde, am pryant nostre Seneur qui vous doinct se que vostre cour desire. Escript a Lanque Set Madelaine. — Le tout vostre servyteur De Choiseul. — Mons. de Touteville.

XXIV. Nicolas DE LA QUESNAIE, chanoine de Rouen, à Guyon D'ESTOUTEVILLE.

Mon tres honoré et redoubté seigneur, il vous plaira faire savoir a monseigneur vostre frere come je suis venu par devers vous et l'empeschement que je ne puis pour le present aller par devers luy a Tours.

Et se vous estes advisé de luy envoier une procuracion, aprez ce que maistre Roger y sera nommé, s'il vous semble bien a faire, on pourra laisser une espace pour en mettre le nom et seurnom d'ung autre, car je ne scay pas se mondit seigneur vostre frere auroit disposé ou deliberé d'y envoier sans aucune dilacion, veu qu'il est a la court et qu'il a opportunité meilleure de faire commander ses lettres par le Roy et faire ses approbacions et verifficacions soubz le seau du Roy que quant il ne seroit pas en court.

Il me semble, se vous n'avez autre opinion au contraire, qu'il n'y a aucun danger d'envoler ladite procuracion par le premier message.

Au sourplus je me recommande tres humblement a vostre noble seigneurie, laquelle Dieu veuille garder de tout mal. — Vostre humble chappellain, Nicolas de la Quesnaye, chanoine de Rouen.

XXV. Guyon D'ESTOUTEVILLE à Jacques D'ESTOUTEVILLE, son frère.

Monsieur mon frere, je me recommande a vous tant comme je puis. Vous scavés la matiere du Mont Saint Michel est conclute et preste a clore et pour faire les [lettres] il fault de l'argent et sollicitude, et sy n'avés homme ycy car vostre procureur est en prison, et me semble que devés renvoier incontinent ce porteur avecquez de l'argent pour paier lesdictes escriptures et advocas et passer ung procureur de la court, et sy fault que envoiés querir Martin le Venart a toute diligence, qui congnoist ladicte matiere, et qu'il soit jeusdi ycy ou vous y airés ung tres grant dommage. De toutes ces choses je vous advertis. Quant est pour Viilebaudon Ledesmandé, vous plus dira comme tout en va. Item, envoiés moy mon chartrier que je vous ay baillié. Et a Dieu soiés, qui vous doint joye. Escript a Rouen, ce dymence matin. — Le tout vostre frere, Guyon d'Estouteville. — Mons. mon frere.

XXVI. Guyon D'ESTOUTEVILLE à Jacques D'ESTOUTEVILLE, son frère.

Monsieur mon frere, je me recommande a vous tant comme je puis. Je vous envoye ce porteur hastivement affin de vous avertir que a diligence vous pourvoiés et lacés metre a seurté Fallaize, car les nouvelles sont telles que monsieur d'Orléans s'en va en Bretaigne et qu'il y a beaucoup de seigneurs et de princes de sa bende, et vous scavés quel voisin vous y avés ; par quoy me semble que feriés bien de envoyer querir monsieur de la Ferté, lequel est venu, et luy metre ; et si vous avertis que j'ay entendu que monsieur de Saint Germain y a grans intelligences et amytiés ovecquez vostredit voesin, et pour ma descharge je vous en avertis, affin que y pourvoiés sans ce que j'en preisse charge que je ne vous aie conseillé pour le bien du Roy et le vostre et vostre honneur et le mien.

Monsieur mon frere, pour ceste année vous ne devés point plaindre l'argent que vous donneriés a monsieur de la Ferté, ou si non vous avés Loys le bastart, lequel vous y serviroit loyaulment et sans vous fere faulte.

Nous advitaille Verneul et aultres places terriblement, et aussi Monsieur de Dunoys Partenay en Poetou, et a fait mondit sieur d'Orleans trente lieues la nuyt et la moetié de jour et va espouser la fille du duc de Bretaigne, et est le duc sur ses piés, et luy ont promis tous acordablement les seigneurs et barons de bien et loyaulment le servir et a tous leur a pardonnés.

Monsieur d'Angoulesme devoit venir en court, mes y ne vendra point, et ne faisoit que faindre de sa venue.